Úrslit í ljóðasamkeppni

Verðlaunahafarnir Sóley, Þorsteinn og Hersteinn. Á myndina vantar Silju Rún.

Frétt fengin af heimasíðu Ljóðaseturs Íslands.

Fjölmenni var við verðlaunaafhendingu í ljóðasamkeppni sl. fimmtudag.

Ljóðasetrið og Umf. Glói hafa staðið að ljóðahátíðinni Haustglæður í Fjallabyggð í 18 ár. Er hún langlífasta ljóðahátíð landsins og einkennismerki hennar er þátttaka barna og ungmenna. 

Fastur liður í hátíðinni er ljóðasamkeppni milli nemenda í 8. - 10. bekk Grunnskóla Fjallabyggðar. Undanfarin ár hafa nemendur þessara bekkja komið í heimsókn í Menntaskólann á Tröllaskaga (MTR) og fengið kveikjur að ljóðum af listaverkum í sal skólans. Listaverkin hafa gjarnan verið eftir nemendur og kennara MTR og svo var líka í ár.

Að þessu sinni urðu til um 80 ljóð og beið 5 manna dómnefndar það vandasama verkefni að velja þau bestu. Fjögur ljóð hlutu atkvæði þriggja dómnefndarfulltrúa eða fleiri og voru höfundar þeirra verðlaunaðir í gær á Ljóðasetrinu og voru flestir nemendur bekkjanna og kennarar þeirra viðstaddir.

Svo skemmtilega vildi til í ár að verðlaunahafarnir komu úr öllum þremur bekkjunum og kynjahlutfallið var jafnt. Verðlaunin voru ljóðabækur og gjafabréf frá veitingastöðum í Fjallabyggð. Gerði Þórarinn Hannesson, forstöðumaður Ljóðasetursins, grein fyrir úrslitunum, flutti verðlaunaljóðin og nokkur ljóð að auki og afhenti verðlaunin við góðar undirtektir viðstaddra. Fjallabyggð og Uppbyggingarsjóður Norðurlands eystra styrkja ljóðahátíðina Haustglæður. 

Hér eru nöfn verðlaunahafanna: Hersteinn Borgarsson 8. bekk, Sóley Birna Arnarsdóttir 9. bekk, Silja Rún Þorvaldsdóttir og Þorsteinn Birgis Valdimarsson úr 10. bekk. Óskum við þeim innilega til hamingju og þökkum öllum þeim sem tóku þátt. Á myndirnar sem fylgja fréttinni vantar Silju Rún.

Hér eru vinningsljóðin og nöfn höfunda:

Húsin

Hús minninganna fljóta í burtu, 

sum brotin, sum ekki. 

Fjölskyldan sem bjó í húsinu 

er farin.

 Þorsteinn Birgis Valdimarsson 10. bekk

Húsin

Húsin standa þétt, 

þar eiga margir heima.

Húsin standa svo þétt 

að þau tala við hvort annað 

og sjá inn um gluggana 

hjá hvort öðru.

 Sóley Birna Arnarsdóttir 9. bekk

Norðurljósin dansa

Norðurljósin dansa 

mjúk á himni 

eins og draumur 

sem enginn sér. 

Í þögninni talar ljósið 

og segir mér 

að allt verði ljós. 

Silja Rún Þorvaldsdóttir 10. bekk

Hugur minn

Hugur minn er eins og sjórinn, 

stundum rólegur 

en stundum ekki.

Bátar eru eins og tilfinningar mínar, 

stundum á miðju hafi 

en stundum nálægt landi. 

Líf allra er sérstakt 

reyndu að lifa þínu besta lífi. 

Hersteinn Borgarsson 8. bekk